TEKOLO YA MOŠOMO
Kgoro e ile ya hlola le go phethagatša peakanyo ye mpsha ka 1 Oktoboro 2003. Batho ba ile ba lekanywa le go bewa diposong tšeo di bego di sa lekolwa nakong ya go hlolwa le go phethagatšwa ga peakanyo ye ntshwa. Kgoro e ile ya fa morerišani, Centricity, mošomo wa go dira ditelo tša mošomo, eupša ke fela diposo tšeo di lego maemong a 9 go ya godimo fela le tše diswa tšeo di ilego tša hlodilwego tšeo di ilego tša lekanywa, gomme tshedimošo yeo e ilego ya hwetšwa ga gwa tšewa magato ka yona. Melawana ya Tirelo ya Setšhaba e gapeletša dikgoro tša mmušo gore di be di dirile maemo ka moka go dibopego tša yona ka 2007.
Bontši bja diposo (bontši e be e le tša maemo a 1 go fihla go 8) bo ile bja katološwa ka bophara go amogela bašomi bao ba bego ba ka se amogelwe mo peakanyong/thulaganyong ye. Se ka manyami se ile sa hlola mathata mo ditefong, moo bašomi ba bego ba amogela ditefo/meputso ya go fapana go šoma mošomo wa go swana. Maikemišetšo a tekolo ya mošomo e be e le rarolla mathata a. Kgoro e ile ya fa moeletši, Gitshasbaya, mošomo wa go dira ditekolo tša mešomo ye e katološitšwe ka bopahara. Diposo ka moka tšeo di bego di katološitšwe mo Kgorong di ile tša laetšwa. Ofisikgolo le diofisi tša dilete di ile tša kgopelwa go rulaganya/beakanya lenaneo la diposo ka moka tše di katološitšwego ka bophara le la bao ba thwetšwego (bao ba lego diposong tše itšego) le go le romela go Ofisikgolo ya Tša Merero ya Bašomi go akanyetšwa. Thulaganyo ye e sa tšwela pele.
Peleng, diposo tše 118 dikarolong tša go fapafapana di ile tša laetšwa go ka lekolwa, eupša palo ye e ile ya oketšega go fihla go 301. Diposo tše 116 di ile tša tlhaolwa go sehlopha sa tekolo ya mošomo, gomme diposo tše 74 di ile tša romelwa bjalo ka ditlhalošo tša mešomo, go dira palomoka ya 190 ya diposo tše di katološitšwego ka bophara. Diposo tše 111 di sa šetše, tše 66 di thulaganyong ya go akanywa. Tše 45 ga di a felelela go fihlela tshedimošo e humanwa go tšwa go balaoding. Go swanetšwe go ela tlhoko gore diposo tše diswa tšeo di swanetšego go lekolwa pele di kwalakwatšwa, le gore ge sebaka sa poso se fetoga e swanetše go lekolwa gape.
Na tekolo ya mošomo ke eng?
Tekolo ya mošomo ke tshepetšo ya go bapetša mešomo gape e šomišwa bjalo ka tekolo ya kgonthe ya go hlatloša bogolo goba boima bja mešomo mo mokgatlong. Ke mokgwa wa go netefatša phethagatšo ya molawana wa moputso wo o lekanago malebana le mošomo a boleng bjo bo lekanago.
Go bohlokwa go ela tlhoko gore tekanyetšo ya mošomo e malebana le diteng tša mošomo le dinyakwa gomme e sego diphapantšho tša motho goba tša tiro ya mongmošomo. Tekolo ya mošomo gantši e gakantšhwa le tekolo ya go šoma. Le ge go le bjalo, ditekolo tša go šoma di lekanya ka moo motho a šomago mošomo ka gona, mola ditekolo tša mošomo di lekanya boima goba bogolo bja mošomo. Go bohlokwa kudu go kwišiša gore tekolo ya mošomo ga e rarolle boima bja mošomo, e bile ga e re gore mongmošomo o tlile go hlatlošwa ge poso ya gagwe e lekotšwe.
Tekolo ya mošomo e ka ga boleng e sego bontši, gape e lebantše go dintlha tše hlano tše di latelago: kgopolo ye e hlokegago, tsebo le mabokgoni, dikgokaganyo, tikologo le maikarabelo.
Na go lekolwa ga poso go akaretša eng?
Ka morago ga tekolo ya mošomo go diragala ya ye nngwe ya tše di latelago:
Tlhatlošo: Ge poso e lekolwa gomme go humanwa gore moputso wa poso o fase ge go laetšwa le a tekolo, poso e a hlatlošwa. Mongmošomo wa poso ye e hlatlošwago o a laetšwa le go lekolwa, go lebeletšwe gore -
mohlankedi o šoma mešomo ya poso, le gore mohlankedi o amogetše tekanetšo ye e kgotsofatšago mo tekolong ya gagwe ya bjale ya mošomo.
Theošo Ge tefo ya poso e le godimo go feta ye e lekwanywago ya mošomo, poso e a theošwa. Mo sebakeng se mongmošomo o swanetše go šuthišwa goba mešomo e swanetše go tlaleletšwa mo posong go oketšwa boleng bja wona.
Maemo ga a fetoge: Poso e ba mo maemong a mogolo a go se fetoge ge dipoelo tša tekolo ya mošomo di netefatša gore tefo ya poso e lokile. Mo sebakeng se go netefatšwa ge mongmošomo a le mo maemong a a nepagetšego.
